പൊതുവിതരണ സംവിധാനം ഇനി സ്മാര്‍ട്ട്..

പൊതുവിതരണ സംവിധാനം ഇനി സ്മാര്‍ട്ട്..

റേഷന്‍കാര്‍ഡ് മാനേജ്‌മെന്‍റ് സിസ്റ്റവും എന്‍റെ റേഷന്‍കാര്‍ഡ് മൊബൈല്‍ ആപ്പും പ്രകാശനം ചെയ്തു

തിരുവനന്തപുരം: ആധുനിക ശാസ്ത്ര സാങ്കേതിക വിദ്യയുടെ മേന്‍മകള്‍ ഉപയോഗിച്ച് സുതാര്യവും ആരോഗ്യകരവുമായ പൊതുവിതരണ സംവിധാനം ഉറപ്പാക്കുവാനാണ് സര്‍ക്കാര്‍ ശ്രമിക്കുന്നതെന്ന് സിവില്‍ സപ്ലൈസ് വകുപ്പ് മന്ത്രി പി തിലോത്തമന്‍. റേഷന്‍കാര്‍ഡ് സംബന്ധമായ അപേക്ഷകള്‍ ഓണ്‍ലൈനായി സമര്‍പ്പിക്കാവുന്ന റേഷന്‍കാര്‍ഡ് മാനേജ്‌മെന്‍റ് സിസ്റ്റം ആദ്യ ലോഗിന്‍ ചെയ്യലും എന്‍റെ റേഷന്‍കാര്‍ഡ് മൊബൈല്‍ ആപ്പിന്‍റെ പ്രകാശനവും നിര്‍വഹിച്ച് സംസാരിക്കുകയായിരുന്നു മന്ത്രി. പൊതുജനങ്ങള്‍ക്ക് സേവനങ്ങള്‍ അനായാസം ലഭ്യമാകുന്നതിനായി പൊതുവിതരണവകുപ്പിനെ ആധുനീകരിച്ചു വരികയാണെന്ന് അദ്ദേഹം ചൂണ്ടിക്കാട്ടി. റേഷന്‍ കാര്‍ഡ് സംബന്ധമായ എല്ലാ അപേക്ഷകളും ഓണ്‍ലൈനില്‍ സമര്‍പ്പിക്കാവുന്ന റേഷന്‍കാര്‍ഡ് മാനേജ്‌മെന്‍റ് സിസ്റ്റം ജൂലൈ അവസാനവാരത്തോടെ എല്ലാ ജില്ലകളിലും നടപ്പാകുമെന്ന് മന്ത്രി പറഞ്ഞു. ആദ്യഘട്ടത്തില്‍ തിരുവനന്തപുരം നോര്‍ത്ത് സിറ്റി റേഷനിംഗ് ഓഫീസിലും ചിറയിന്‍കീഴ് താലൂക്ക് സപ്ലൈ ഓഫീസിലും ഈ സംവിധാനം നടപ്പിലായി. റേഷന്‍കാര്‍ഡ് സംബന്ധിച്ച ഏത് ആവശ്യത്തിനും ബന്ധപ്പെട്ട ഓഫീസുകളില്‍ കയറിയിറങ്ങാതെതന്നെ അപേക്ഷ സമര്‍പ്പിക്കാന്‍ ഇനി മുതല്‍ പൊതുജനത്തിന് സാധിക്കുമെന്നും മന്ത്രി ചൂണ്ടിക്കാട്ടി.

അക്ഷയ സെന്‍ററുകള്‍ക്കുള്ള യൂസര്‍നെയിമും പാസ്‌വേഡും ഐടി സെക്രട്ടറി എം ശിവശങ്കരനു നല്‍കി മന്ത്രി പ്രകാശനം ചെയ്തു. ആദ്യമായി ഓണ്‍ലൈന്‍ മുഖേന റേഷന്‍കാര്‍ഡിന് അപേക്ഷിച്ച സ്റ്റേറ്റ് ഇന്‍ഫര്‍മാറ്റിക്‌സ് ഓഫീസര്‍ കെ മോഹന്‍ദാസിന് മന്ത്രി റേഷന്‍കാര്‍ഡ് കൈമാറി. സിവില്‍ സപ്ലൈസ് വകുപ്പ് സെക്രട്ടറി മിനി ആന്റണി, മറ്റ് ഉദ്യോഗസ്ഥര്‍ തുടങ്ങിയവര്‍ സംബന്ധിച്ചു.
വകുപ്പിന്റെ ഔദ്യോഗിക വെബ്‌സൈറ്റായ civilsupplieskerala.gov.in
ലൂടെ നേരിട്ട് റേഷന്‍കാര്‍ഡ് മാനേജ്‌മെന്‍റ് സംവിധാന (ആര്‍സിഎംഎസ്)ത്തില്‍ പ്രവേശിക്കാം.

പുതിയ റേഷന്‍ കാര്‍ഡിന് അപേക്ഷിക്കാനും കാര്‍ഡിലെ അംഗങ്ങളെ മറ്റൊരു താലൂക്കിലേക്ക് മാറ്റുന്നതിനും കാര്‍ഡ് സറണ്ടര്‍ ചെയ്യാനും ഉടമസ്ഥാവകാശം മാറ്റാനും വിലാസം മാറ്റാനും റേഷന്‍കട മാറ്റാനും ഡ്യൂപ്ലിക്കേറ്റ് റേഷന്‍കാര്‍ഡിന് അപേക്ഷിക്കാനും പേര് തിരുത്താനും അംഗങ്ങളെ ഒഴിവാക്കാനും കൂട്ടിച്ചേര്‍ക്കാനും ഈ സംവിധാനം പ്രയോജനപ്പെടുത്താം. അപേക്ഷകള്‍ സംബന്ധിച്ച മറ്റു നടപടികള്‍ പൂര്‍ത്തിയായതിനുശേഷം ബന്ധപ്പെട്ട ഓഫീസില്‍ നിന്ന് അപേക്ഷകര്‍ക്ക് മൊബൈല്‍ ഫോണില്‍ സന്ദേശം ലഭിക്കും. അതനുസരിച്ച് റേഷന്‍കാര്‍ഡ് കൈപ്പറ്റിയാല്‍ മതി. പുതിയ റേഷന്‍ കാര്‍ഡിന് അപേക്ഷിക്കാന്‍ 50 രൂപയും മറ്റു സേവനങ്ങള്‍ക്ക് 35 രൂപയുമാണ് അക്ഷയ സെന്‍ററുകള്‍ ഈടാക്കുന്നത്. ഗൂഗിള്‍ പ്ലേ സ്റ്റോറില്‍ നിന്ന് എന്‍റെ റേഷന്‍ കാര്‍ഡ് എന്ന മൊബൈല്‍ ആപ് ഡൗണ്‍ലോഡ് ചെയ്തും ഈ സേവനങ്ങള്‍ പ്രയോജനപ്പെടുത്താം.

അക്ഷയ കേന്ദ്രങ്ങളിലൂടെ ഈ സേവനങ്ങള്‍ ലഭ്യമാക്കാം